Residuos

Obrigas que lles atinxen aos produtores de residuos de construcción e de demolición (RCDs) en canto ao seu depósito e entrega dos mesmos a un xestor habilitado para a súa recollida.

NOTIFICACIÓN DA ACTIVIDADE DE PRODUCCIÓN.- Están suxeitas ao requisito administrativo de notificación as actividades de produción de RCDs, que xeren máis de 3 Tm. de residuos por obra ou demolición realizada. (Artigo 5.d do Decreto 174/2005).

(Este trámite administrativo da notificación deben de realizalo diante da Administración autonómica, e, de necesitar asesoramento ao respecto, poden requirilo no Departamento de Medio Ambiente do Concello, ben persoalmente ou ben a través dos teléfonos ou telefax citados enriba).
PRESENTACIÓN DOS RESIDUOS PARA A SÚA RECOLLIDA POR XESTOR.- Os residuos de construcción e demolición deberán depositarse ordenadamente para a súa posterior recollida por un xestor autorizado do seguinte xeito:
- Se a producción dos residuos da obra son dun volume superior a un metro cúbico, deberanse depositar nun contedor de obra facilitado polo xestor autorizado. O contedor será dos habitualmente empregados no sector e levará escrito a identidade da persoa física ou xurídica titular da xestión.
- Se a producción de RCDs. é inferior a un metro cúbico, en lugar de contedores de obra, poderanse usar bolsas específicas para tales residuos, que deberán facilitar igualmente os xestores.
- Tanto os contedores como as bolsas específicos/as deberán situarse dentro do recinto da obra, --non accesibles a persoas alleas á actividade--, e, de teren que ocupar espazos de dominio público é cumprido que conten coa previa autorización do titular de dito dominio.
- Os residuos procedentes da construcción ou demolición que teñan a categoría de perigosos deberanse depositar fóra destes contedores e dun xeito idóneo para facilitar a posterior recollida polo xestor.
- De producírense na obra residuos orgánicos ou inorgánicos dos considerados urbanos, o seu depósito realizarase do mesmo xeito que calquera particular-- nos contedores específicos existentes na vía pública (orgánicos: contedores de tapa verde / papel e cartón: contedores azuis / vidro: iglús verdes / inorgánicos distintos do papel, cartón ou vidro: contedores de tapa laranxa ou marela / voluminosos: Punto Limpo).
PROHIBICIÓNS EXPRESAS: Como consecuencia das alíneas anteriores, prohíbese expresamente o depósito directo, o abandono ou o vertido dos residuos procedentes de obras e demolicións, nos seguintes espazos:
- Regos, ríos, lagoas, encoros ou calquera outro dominio público hidráulico, ou nas súas marxes ou zonas de servidume ou policía.
- Estradas ou camiños públicos, zonas de servidume ou de afección das mesmas, agás que se conte con autorización do titular do dominio público terrestre para facelo.