Agosto

O alcalde de Arteixo, Manuel Pose, participará o vindeiro xoves 29 de agosto, na merenda organizada polo departamento de Servicios Sociais para despedir ós sete nenos saharahuis que este verán chegaron a Arteixo para participar no programa "Vacacións en Paz".

A festa, á que se quere invitar a tódolos nenos do municipio que o desexen, servirá para que o alcalde entregue ós nenos saharahuis material escolar e outros agasallos que repartirán nos campos de refuxiados.

A cita se desenvolverá entre as 18.00 h e as 19.30 h no parque situado nas inmediacións do Centro Cívico e Cultural.

O Concello de Arteixo, a través do servicio municipal de deportes, ven de remata-las obras de construcción do novo campo de fútbol de Freán.

Os traballos supuxeron un desembolso global para as arcas municipais de 110.735,16 €. O peche do campo representa o maior orzamento con 59.501,03 €; acondicionamento e vestiarios superaron os 48.000 €.

O novo campo será inaugurado oficialmente o vindeiro día 31 de agosto nun acto que presidirá o alcalde do municipio Manuel Pose Miñones a partir das 20.00 h.

O Servicio Municipal de deportes considera prioritaria a dotación de infraestructuras deportivas suficientes en cada unha das parroquias do término municipal de cara á consecución do seu principal obxectivo que é a implicación de tódolos sectores de poboación na práctica do deporte. Neste sentido o concello traballa na búsqueda de terreos para a construcción de novas instalación en Pastoriza e Oseiro. Recentemente acometiuse a construcción do campo de fútbol de Uxes e ven de se aprobar en pleno unha partida superior ós 90.000 € no presuposto de 2002 e outra de máis de 110.000 € con cargo ós presupostos de 2003 para a execución dunha pista polideportiva cuberta en Galán.

A Comisión de Goberno do Concello de Arteixo aprobou, para a anualidade de 2002, unha reducción do 50% no importe correspondente ó pagamento do IAE ós comercios "afectados" polas obras de peatonalización da Avenida do Balneario.

Trátase dunha medida compensatoria para paliar os presuntos prexuízos que as obras poidan provocar na actividade empresarial.

A decisión adoptada polo goberno que preside Manuel Pose pretende apoiar ó desenvolvemento do pequeno comercio e por extensión, á economía do municipio. Unha vez rematen os traballos de peatonalización, o novo trazado da Avenida compensará con creces os posibles prexuízos actuais xa que se converterá na rúa comercial de referencia no termo municipal.

Economicamente a reducción do IAE beneficia a corenta e catro negocios, de tódolos tipos ( hostalería, boutique, óptica, calzado, salóns de peiteado...) e supón unha reducción do ingreso previsto polo concello, en concepto de IAE, de aproximadamente 9000 €.