REGULAMENTO DE FUNCIONAMENTO DA BIBLIOTECA MUNICIPAL DO CONCELLO DE ARTEIXO

"A biblioteca pública é un servizo de existencia obrigatoria dos especificados no artigo 26.1.b) da Lei 7/1985, de 2 de abril, Reguladora das Bases de Réxime Local, para todos os concellos que teñan máis de 5.000 habitantes, ou que conten cun núcleo urbano con poboación superior a 1.000 habitantes

A competencia municipal respecto a esta materia está recoñecida nos artigos 25.2.m) da antedita Lei 7/1985, do 2 de abril e 80.2. da Lei 5/1997, do 22 de xullo, de Administración local de Galicia, baixo o título "Actividades e instalacións culturais".

En consecuencia, apróbase o presente regulamento, polo que se establece o funcionamento da Rede Municipal de Bibliotecas, declarando expresamente o carácter de servizo público adscrito á Concellaría de Cultura.

CAPÍTULO I

ORGANIZACIÓN E SERVIZOS DA BIBLIOTECA.

Artigo 1.- Servizo público da biblioteca e forma de xestión.

As bibliotecas do Concello de Arteixo son un servizo público de titularidade municipal e de carácter obrigatorio que se presta en exercicio da competencia que prevé o artigo 25.2. m) da Lei 7/1985, do 2 de abril, reguladora das bases de réxime local.
O Concello xestiona directamente o servizo de bibliotecas municipais, a través da Concellaría de Cultura, tendo a súa sede na Casa da Cultura de Arteixo.
As bibliotecas públicas municipais de Arteixo están integradas na Rede de bibliotecas de Galicia e inscritas no Rexistro de bibliotecas de Galicia.

Artigo 2.- Finalidades das bibliotecas

As bibliotecas municipais son unha institución que teñen por finalidade facilitarlle aos cidadáns o exercicio do dereito á cultura e á información, divulgar a lectura e promover especificamente a lingua e a cultura galegas.
A través das bibliotecas municipais o Concello fomentará a lectura como medio de acceso ao pensamento e ás ideas humanas. Con esa finalidade desenvolverá periodicamente campañas de animación á lectura, especialmente entre os máis novos.

Artigo 3.- Rede de bibliotecas municipal

A rede de bibliotecas municipal está composta pola Biblioteca Municipal Central, situada na Casa da Cultura, e as axencias de lectura de Oseiro e Meicende, e as que no futuro se puidesen crear.
A Biblioteca Central é o punto principal da rede municipal de bibliotecas onde se centralizan as adquisicións de fondos, a organización e a catalogación.
As axencias de lectura son puntos bibliotecarios municipais dependentes da Biblioteca Central.
A dirección técnica correspóndelle ao Bibliotecario municipal.

Artigo 4.- Dos fondos bibliográficos.

Os fondos bibliográficos de todos os puntos bibliotecarios anteriores están compostos polas adquisicións propias con cargo aos orzamentos municipais e ás doazóns de particulares ou entidades. Estarán a disposición do público debidamente catalogados e clasificados en diferentes seccións.
A biblioteca municipal disporá dun catálogo dos fondos, con acceso para o usuario. Os catálogos responden á normativa internacional e, nun futuro próximo, os datos presentaranse informatizados, con descricións baseadas no formato MARC.
A biblioteca municipal de Arteixo disporá de publicacións periódicas, arquivándose na Biblioteca Central aquelas que se consideran de interese, sendo norma xeral o arquivo durante un mes para os xornais e un ano para as revistas.
Os fondos, bibliográficos ou non, atópanse a disposición do público, de xeito gratuíto, para consulta nas salas ou préstamo a domicilio. O usuario terá ó seu dispor desideratas a través das que poderá propor novas adquisicións

Artigo 5.- Servicios da biblioteca

A biblioteca pública municipal presta os seguintes servicios básicos:
- Información bibliográfica
- Consulta en sala
- Préstamo a domicilio.
- Hemeroteca
- Sección infantil-Xuvenil.
A Biblioteca Central terá unha sección local onde se conservarán obras e documentación relativas ao municipio ou de escritores que teñan relación co mesmo.
A Biblioteca Central dispón dunha sala de medios audiovisuais composta de equipos de ordenadores, para a reproducción de música e para a visión de vídeos que o usuario poderá utilizar. Así mesmo dispón dun fondo de discos compactos, CD-ROM e vídeos que serán obxecto de préstamo e utilización nesta sala.
O Director das bibliotecas deberá posuír titulación universitaria e contar con formación técnica nesa especialidade.
O persoal auxiliar deberá ter unha titulación mínima de graduado escolar e posuír coñecementos de biblioteconomía básica.

Artigo 6.- Horario de atención ao público.

O horario de atención ao público da biblioteca Central municipal será de alomenos 30 horas á semana, ao longo de seis días, en xornada de mañá e tarde, agás o sábado.
O horario de atención ao público nas axencias de lectura será de alomenos 15 horas á semana, de luns a venres.
Durante a tempada de verán adoptarase un horario continuado de mañá durante cinco días á semana.
O horario de atención ao público figurará, en lugar visible, na entrada das bibliotecas.

Artigo 7.- Coordinación cos centros escolares.

O Concello promoverá a coordinación do funcionamento da biblioteca municipal coas dos centros escolares do municipio, de conformidade coas directrices que sinale a Xunta de Galicia.

CAPÍTULO II

USUARIOS DAS BIBLIOTECAS

Artigo 8.- Acceso á biblioteca

Recoñéceselle a todas as persoas o dereito a accederen en condicións de igualdade e sen discriminacións ás dependencias das bibliotecas municipais e a obteren información sobre os seus servizos e sobre os procedementos de utilización. O exercicio dese dereito é libre e gratuíto.

Artigo 9.- Normas en sala para usuarios

A consulta en sala poderá realizarse por calquera persoa sen necesidade de ser socio das bibliotecas.
As persoas que utilicen os servizos das bibliotecas están obrigadas :
- A respectaren os dereitos dos outros usuarios/as
- A axustaren a súa conducta aos principios democráticos de convivencia, ás disposicións que contén este regulamento e ás instruccións que en execución del dicten as autoridades municipais ou lles dean os traballadores responsables das bibliotecas
- A preservaren a integridade dos libros, materiais e instalacións das bibliotecas e a faceren un uso adecuado deles.
Os fondos bibliográficos serán de libre acceso a excepción dos contidos nos depósitos que se poderán consultar a través dos catálogos.
Os fondos audiovisuais atoparanse clasificados en vitrinas e, para o seu uso, consultaran se os inventarios que estarán a disposición do público.
O persoal responsable das bibliotecas adoptará as medidas precisas para garantir a boa orde nas salas de lectura e poderá excluír delas ás persoas que, por calquera motivo, a alteren.
Non está permitido comer nin fumar nas salas así como tampouco non está permitida a entrada de bolsos de gran tamaño, mochilas ou similares que deberán deixarse na entrada da Biblioteca, non facéndose responsable o persoal en ningún caso
Os teléfonos móbiles deberán permanecer apagados

Artigo 10.- Uso dos equipos en sala:

O usuario deberá ser socio das Bibliotecas e ter cumpridos os 12 anos de idade para a utilización dos equipos informáticos e 9 anos para a utilización dos equipos de música e audiovisuais.
Os diversos equipos poderanse utilizar na sala de audiovisuais previa cita de día e hora ou ben directamente cando se atopen libres.
No que á informática se refire, tan só se poderán utilizar documentos propios da Biblioteca.
En canto a Biblioteca Central dispoña de INTERNET para uso dos socios serán os maiores de 16 anos ou menores de entre 12 e 16 acompañados polos pais ou titores, os que poderán solicitar sesións.
Non estará permitido o chateo xa que o uso fundamental será a busca de información ou temas culturais. Se algún usuario se aparta destas directrices, o persoal das bibliotecas poderá remata-la sesión de INTERNET.

Artigo 11.- Do carné de socio

Para se poder beneficiar do servicio de préstamo individual, e uso de equipos en sala o usuario deberá dispor dun carné de socio.
Para obter o carné de socio será preciso presentar unha solicitude, coa que se achegará unha fotocopia do documento nacional de identidade se é que a persoa está obrigada a telo, ou documento equivalente e unha fotografía.
O carné será válido para todas as bibliotecas do Concello de Arteixo.
O carné de socio é persoal polo que, por norma xeral, non se poderán levar libros con carnés doutros usuarios con excepción feita daqueles que traian un permiso xustificado para tal fin e os pais de menores de 10 anos que poderán retirar libros cos carnés dos seus fillos sempre que vaian dirixidos a ditas idades.
O primeiro carné será gratuíto, caso de perda o usuario pagará 100 ptas. para obter unha segunda copia.
Os socios comprométense a notificar os cambios de identidade, enderezo ou teléfonos que poidan ter desde o momento de faceren o carné de socio.

Artigo 12.- Préstamos a domicilio

Os socios das bibliotecas poderán levar en préstamo os fondos bibliográficos ou audiovisuais, se é o caso, mediante a presentación do carné de socio que será válido para todas as bibliotecas municipais con independencia do punto no que estea rexistrado como tal.
Cada socio poderá levar 3 libros e 2 documentos audiovisuais nos días sinalados a tal fin (1 vídeo e un CD ou 2 CD).
Os libros prestaranse durante un período de 12 días e poderanse renovar unha vez. Cando o número de páxinas sexa importante ou debido a algunha dificultade engadida ou causa xustificada, o usuario terá dereito a renovalo unha segunda vez, sempre a criterio do responsable da Biblioteca. Os documentos audiovisuais prestaranse por un período de unha semana, renovábel por outra, agás os vídeos.
Quedan fóra do dereito a préstamo:
- as enciclopedias e diccionarios e, en xeral, os de consulta frecuente,
- os exemplares raros e de particular interese histórico, artístico e bibliográfico
- os exemplares únicos de custosa reposición, e
- outras obras que exclúa a dirección en atención ás súas características especiais.
O préstamo realizarase ata 10 minutos antes do peche da Biblioteca.

O Alcalde poderá autorizar o préstamo dalgunha obra restrinxida ao préstamo para exposicións, intercambio...

CAPÍTULO III

RÉXIME SANCIONADOR

Artigo 13.- Sancións e responsabilidades.

A demora na devolución, o deterioro ou a perda dos fondos obxecto de préstamo, dará lugar á correspondente sanción, previa audiencia ao interesado. A competencia para resolver correspóndelle ao Alcalde ou, por delegación del, ao concelleiro de Cultura.
A sanción consistirá na suspensión temporal do dereito ao préstamo de fondos por un prazo de quince días a tres anos, ou en multa de 500 a 5.000 pesetas.
As sancións imporanse con respecto ao principio de proporcionalidade e teranse en conta a gravidade do feito constitutivo da infracción e os criterios de intencionalidade, reiteración, natureza dos prexuízos causados e a reincidencia.
En calquera caso, a persoa responsable do deterioro ou perda dun libro deberao repoñer pola súa conta ou indemnizarlle ao Concello o seu valor.

DISPOSICIÓN FINAL

Este regulamento entrará en vigor logo de que se publique enteiramente o seu texto no Boletín Oficial da Provincia e transcorra o prazo de quince días a que se refiren os artigos 70.2 e 65.2 da Lei 7/1985, do 2 de abril, reguladora das bases de réxime local".