Aprobado polo Pleno da Corporación de data vintenove de maio do ano 1997.

Publicado no BOP núm. 232 de data nove de outubro do ano 1997.

ORDENANZA REGULADORA DA PRESTACIÓN DO SERVIZO DE AXUDA A DOMICILIO E TELEASISTENCIA DOMICILIARIA.

Artigo 1

• Enténdese á Axuda a domicilio como unha prestación e instrumento de intervención social debidamente regulado e obxectivado que se desenvolve no domicilio do usuario.

  En tanto que servicio orientado ao individuo busca garantir a súa autonomía cando por calquera causa se vexa illado ou forzado a depender da familia, veciñanza, etc.

  En tanto que é un servizo orientado á familia procura optimizar o seu rol socializador, orientando a súa intervención cara á reestructuración das relacións internas, a mellora na administración de recursos domésticos e o apoio educativo que evite a ruptura do núcleo familiar. En ningún caso substitúe ás responsabilidades da familia, senón que as complementa, tendo como obxectivos, os seguintes:

  • Previr situacións de crise individual e/ou familiar, prestando apoio social e persoal.
  • Deter situacións de deterioro.
  • Ofrecer apoio individualizado que favoreza a autonomía persoal e social.
  • Potenciar a utilización de recursos comunitarios e do seu entorno.
  • Favorecer a dinámica familiar.
  • Evitar internamentos non desexados e a ruptura do núcleo familiar.
  • Creación de hábitos de hixiene, alimentación, etc.
• O Servizo de Teleasistencia domiciliaria defínese como un servizo que, a través da liña telefónica, permite que as persoas maiores e discapacitadas, ante unha situación de emerxencia e só pulsando un botón dun aparello que sempre levan encima, poidan entrar en contacto verbal "mans libres" co centro da Cruz Vermella da Coruña onde o persoal dará resposta á emerxencia presentada, ben por si mesmo ou mobilizando outros recursos da Comunidade (Garda Civil, Servizos Sanitarios,....)

Artigo 2

• Establécese como horario do servizo de axuda a domicilio de luns a venres, de 7 da mañá a 9 da noite, quedando excluídas as fins de semana, festivos e horario nocturno.
• O Servicio de Teleasistencia Domiciliaria préstase as 24 horas do día, os 365 días do ano, complementándose con outro servicio denominado "Axenda do Usuario" que lle permite lembrar as actividades concretas que debe realizar, tal como toma de medicación, etc.

Artigo 3

• O Servizo de Axuda a Domicilio, no termo municipal de Arteixo, comprenderá dous niveis de atención:
  • Nivel persoal: aseo persoal, administración de comidas e/ou medicamentos, así como control dos mesmos, pequenas curas, atención a encamados, control da economía doméstica, etc.
  • Nivel doméstico: Limpeza do domicilio, lavado, pasado de ferro, compras, comidas, bricolaxe puntual e organización do fogar.
• O Servizo de Teleasistencia domiciliaria permite que as persoas maiores e discapacitadas que non precisan atención presencial doutras persoas teñan a seguridade de que ante unha emerxencia, poidan contactar coa Cruz Vermella para recibir axuda inmediata.

Artigo 4

• Serán beneficiarios do Servizo de Axuda a Domicilio:
  • Anciáns con incapacidades físicas ou psíquicas que presenten unha limitación clara da súa autonomía persoal, e que vivan sos ou con familiares que non os poidan atender por razóns de enfermidade, traballo, etc.

    Anciáns que teñen ao seu cargo algún familiar necesitado de atención e que non poden atender correctamente.

  • Adultos con grandes incapacidades para desenvolverse de forma autónoma, xa sexa temporal ou definitivamente, a causa de enfermidades ou diminución psíquica, que vivan sos ou con familiares que non os poidan atender.
  • Familias con menores ao seu cargo, aos que non poden atender por hospitalización temporal dos pais, graves enfermidades dos mesmos ou deterioro social grave.

  As persoas que reunindo os anteriores requisitos sinalados nos apartados a), b) e c), e que perciban ou teñan dereito a percibir axuda a domicilio doutro organismo, quedan excluídos do Servizo de Axuda a Domicilio a prestar por este Concello. Así mesmo, quedan excluídas as persoas que teñan familiares obrigados por lei a atendelos. Neste caso, deberá demostrarse que viven lonxe, ou que non os poden atender tanto a nivel persoal como económico.

• Serán beneficiarias do Servicio de Teleasistencia domiciliaria, aquelas persoas maiores, eivadas ou enfermas que estean incapacitadas física ou socialmente para valerse por si mesmas, tanto en situacións permanentes como transitorias (enfermidades, postoperatorios, etc.)

Serán requisitos para a prestación do Servizo de Teleasistencia domiciliaria, propostos pola Cruz Vermella, segundo convenio asinado polo Concello de Arteixo con dita entidade:

• Estar en situación de risco, vivir todo o día ou gran parte só ou convivir con persoas en risco similar.
• Ter cubertas as necesidades básicas de alimentación, vestido, aseo e vivenda.
• Non padecer enfermidade ou incapacidade mental, incluíndo a demencia senil.
• Non ter deficiencias de audición graves ou dificultades para falar, toda vez que a comunicación coa central da Cruz Vermella é verbal.

Así mesmo, e á marxe dos requisitos requiridos polo Cruz Vermella, os usuarios da teleasistencia domiciliaria deberán:

• Estar empadroados no Concello de Arteixo.
• Aboar o prezo establecido no texto normativo do prezo público regulador deste servizo.

Artigo 5

• O servizo de axuda a domicilio será prestado polo Concello de Arteixo, ben de oficio ou a instancia de particular.

  Farase en modelo oficial, que para tal fin poderá recoller nas oficinas municipais.

  Calquera veciño poderá poñer en coñecemento dos servizos sociais os supostos de persoas ou familias que coñezan e que ao seu xuízo necesiten dito servizo para que, previa avaliación de tódalas circunstancias persoais e sociais, o Concello poida prestalo, previa aceptación do posible beneficiario.

• O Servizo de Teleasistencia Domiciliaria será prestado, de oficio ou a petición do interesado, pola Cruz Vermella.

Artigo 6

• Ademais da solicitude, o interesado no beneficio prestado polo Servicio de Axuda a Domicilio e Teleasistencia Domiciliaria, deberá achegar a seguinte documentación:
  • Fotocopia do DNI e da cartilla da Seguridade Social dos/as solicitantes.
  • Certificado médico, segundo modelo que se facilitará na dependencia de Servizos Sociais ou informes médicos, necesarios para avaliar a prestación.
  • Xustificantes de ingresos de toda a unidade familiar:
    • Fotocopia da declaración da renda ou certificación negativa.
    • Xustificantes de pensión, prestación do INEM, nómina, etc.
    • Certificación de intereses cobrados por capitais mobiliarios.
    • Certificación expedida polos servicios económicos municipais sobre a situación contributiva dos solicitantes, pedida de oficio polo equipo de Servizos Sociais.
    • Declaración sobre percepción de alugueres.
    • Recibos de aluguer de vivenda dos beneficiarios.
  • Calquera outro que se considere necesario para a baremación da solicitude e de que teña relación cos aspectos valorados na mesma.
  • Certificado de empadroamento.

Artigo 7

As solicitudes para percibir o Servizo de Axuda a Domicilio (S.A.D.) e Teleasistencia Domiciliaria (T.D), formalizaranse por escrito, a través de instancias dirixidas ao Sr. Alcalde-Presidente da Corporación Municipal, achegando a documentación sinalada no artigo 6º.

Recibida a instancia, xunto coa documentación, procederase polos técnicos responsables á comprobación dos datos achegados, baremando as solicitudes (segundo anexos que se achegan ao presente texto normativo) e elaborando un informe posterior, que será sometido a dictame da Comisión Informativa correspondente. Ao mesmo tempo elevarase á Comisión de Goberno, que será quen decida en última instancia.

Así mesmo, prevese a concesión do S.A.D. e do T.D. con carácter urxente, en casos de grave perigo para a vida do usuario, altas hospitalarias ou ingreso de persoas con familiares ao cargo. Nesta situación será o Alcalde-Presidente ou Concelleiro responsable quen decida a concesión ou denegación do servizo, dando conta na próxima Comisión de Goberno que se realice. A concesión destes servizos nas condicións descritas, será por un tempo máximo de un mes.

A concesión do servizo considérase prorrogada en tanto non se acorde a súa baixa na Comisión de Goberno ou por Resolución da Alcaldía, ou ben presente baixa xustificada o interesado.

Contra a denegación do servizo, o interesado poderá interpoñer os recursos e reclamacións estipulados na lexislación vixente.

A prestación do S.A.D. e T.D. queda condicionada á aceptación do mesmo por parte da familia, que se reflectirá nun documento de compromiso, no que se especifican as condicións do servizo, as obrigas da familia e os casos de suspensión do servizo.

Artigo 8.- Profesionais do S.A.D.

• Asistenta Social: Profesional que recibe a demanda e realiza un primeiro estudo.
• Educadora de familia: Fará un seguimento de cada caso, sinalando a intervención a facer. Son funcións súas:
  • Dar a coñecer o servizo.
  • Responsabilidade e coordinación do mesmo.
  • Facer o estudio e diagnose de cada caso.
  • Definir os obxectivos da intervención.
  • Planear a estratexia a seguir e asignar os profesionais e voluntarios máis adecuados.
  • Facer un seguimento de cada caso e manter reunións periódicas cos profesionais que presten o servizo.
  • Reforzar a formación e reciclaxe do persoal que fai un traballo domiciliario.
• Traballadora Familiar. Profesional que fai nos fogares as tarefas que contribúen á prestación do S.A.D. Desempeñar un labor pedagóxico co usuario, a familia e seu entorno inmediato. Fundamentalmente debe traballar nos hábitos e as actitudes positivas do usuario na súa relación co mesmo. Son funcións súas:
  • Executar os servizos de limpeza do fogar, aseo persoal, etc, deseñados no modelo de intervención.
  • Facer ao usuario protagonista do seu proceso de vida e non substituílo naquelas funcións que poida desenvolver por el mesmo.
  • Educar as persoas para crear ou manter hábitos de limpeza da casa, aseo persoal, control de menciñas, etc.
  • Actuar de enlace entre o usuario e os técnicos do servizo.
  • Prever situacións de marxinalidade e/ou illamento ou evitar que os problemas ou limitacións que presenten os usuarios xeren outros.
  • Favorecer o apoio social aos usuarios facilitando o labor dos voluntarios, fomentando o contacto co exterior.

Artigo 9.- SUSPENSIÓN DO SERVICIO DO S.A.D. E T.D.

• Do Servicio de Axuda a Domicilio. Dito Servizo suspenderase nos seguintes casos:
  • Por falecemento do usuario.
  • Por mellora ou cambio da situación familiar que deu lugar á concesión do servizo.
  • Por ingreso do beneficiario en residencia ou traslado a outro concello.
  • Por falta de colaboración do usuario ou da familia para a consecución dos obxectivos previstos.
  • Se a familia utiliza calquera dos servicios para fins diferentes aos propios dos previstos.
  • Cando a familia oculta datos económicos ou doutra índole para acceder ao servizo.
  • Cando por necesidades do servizo sexa necesario ampliar o número de usuarios e se consideren prioritarios outros casos en consideración á situación persoal, sanitaria e económica do beneficiario e a súa familia.
  • Por deterioro intencionado do equipo de Telealarma instalado no domicilio do usuario.

Artigo 10.- DO VOLUNTARIADO SOCIAL.

O Concello potenciará o voluntariado social como forma de fomento da solidariedade veciñal e como complemento necesario para a boa efectividade dos Servizos.

Son funcións do Voluntariado Social:

• Visitar ao usuario e facerlle compaña.
• Conectar ao usuario co seu medio.
• Fomentar actividades dentro do fogar cando o usuario teña dificultades para saír del.
• Reforzo escolar de nenos con dificultades de rendemento neste medio, etc.

Artigo 11.- BAREMACIÓN.

Se a solicitude presentada cumpre os requisitos sinalados no apartado anterior, o Equipo de Servizos Sociais fará unha valoración e sinalará unha puntuación segundo o baremo. Esa puntuación xunto coa data de presentación da solicitude marcarán o lugar a ocupar na listaxe de espera.

Teranse en conta os seguintes baremos, de acordo cos seguintes grupos:

• Dificultades en relación á autonomía persoal. Problemática física e/ou deterioro psíquico.
  • Persoas que aínda que teñen algunha limitación poden levar unha vida normalizada 1punto.
  • Persoas que teñen algunha dificultade nos actos diarios e ás veces precisan axuda (necesidade de bastón para poder camiñar; incontinencia total ou esporádica; déficit visual; limitacións propia da idade avanzada; desorientación no tempo; conversa posible pero non perfecta; recoñecer persoas ou obxectos, pero, ás veces, esquece algunha cousa, etc.)4 puntos.
  • Persoas con graves dificultades nos actos da vida diaria (camiña con dificultade, axudado ó menos por unha persoa; Incontinencia ocasional; grave déficit visual; grave déficit auditivo; desorientación importante; imposibilidade de manter unha conversa lóxica; confusión das persoas; claros trastornos do humor; etc) 6 puntos
  • Persoas que precisan axuda en case tódolos actos da vida diaria (camiñar con extrema dificultade; incontinencia habitual; cegueira; inmobilidade na cama ou cadeira de brazos; necesidade de continuos coidados de enfermería; desorientación; claras alteracións mentais cualificadas de demencia, incluído o descoñecemento das persoas, etc) 8 puntos..
• Situación da unidade convivencial.
  • Persoas que conviven con persoas válidas : 1 punto.
  • Persoas que poden ser atendidos por familiares ou veciños, resultando esta insuficiente, ben por falla de compromiso, excesiva carga, ou dificultades de organización: 3 puntos.
  • Persoas que poden ser atendidos por familiares e/ou veciños de forma ocasional ou en caso de emerxencia: 5 puntos.
  • Persoas que viven soas e non teñen familiares ou veciños que se ocupen delas, ou non vivindo soas, viven con persoas con graves dificultades físicas e/ou psíquicas, ou que sen telas, non poden por idade ou circunstancias atender debidamente ao usuario. Neste apartado incluiranse tamén aquelas situacións nas que as relacións familiares non existan ou sexan moi conflictivas:8 puntos.
• Situación económica.

  Considéranse os ingresos económicos de TODA A UNIDADE FAMILIAR, entendendo por esta, as persoas que tendo parentesco viven no mesmo domicilio.

  Teranse en conta os seguintes aspectos:

  • Ingresos por salario neto, pensións, prestacións do INEM, etc., rateo das pagas extraordinarias.
  • Xuros bancarios, cando superen as 60.000.-pts/ano.
  • Ingresos en metálico por calquera outro concepto (rendas de alugueres, devolución da declaración da renda, etc.

  Coa suma de tódolos ingresos farase unha media mensual que será o que se teña en conta para o cálculo da achega do usuario dos servicios, descontando o importe do aluguer de vivenda e os gastos ocasionados polo servicio doméstico particular.

  En situacións familiares moi conflitivas só se terá en conta a economía do usuario.

  Pártese dunha Renda Mínima (R.M.) igual ao importe íntegro da Pensión Non Contributiva (P.N.C.), engadíndolle o rateo das pagas extraordinarias. Esta cifra revalorizarase cada ano segundo a contía da P.N.C.

  PUNTUACIÓN

  R.M.

  Unha persoa

  Inferior ao 100 % da R.M.	5 puntos
  Desde o 100 % ata o 125 %	3 puntos
  Máis do 125 % ata o 155 %	2 puntos
  Máis do 155 % ata o 175 %	1 punto

  Dúas persoas

  Inferior ao 75 % da R.M.	5 puntos
  Desde o 75 % ata o 100 %	3 puntos
  Máis do 100 % ata o 125 %	2 puntos
  Máis do 125 % ata o 150 %	1 punto

  Tres persoas

  Inferior ao 60 % da R.M.	5 puntos
  Desde o 60 % ata o 80 %	3 puntos
  Máis do 80 % ata o 100 %	2 puntos
  Máis do 100 % ata o 125 %	1 punto

  Catro ou máis persoas

  Inferior ao 50 % da R.M.	5 puntos
  Desde o 50 % ate o 65 %	3 puntos
  Máis do 65 % ate o 80 %	2 puntos
  Máis do 80 % ate o 100 %	1 punto

Artigo 12

• O Servicio de Axuda a domicilio e Teleasistencia Domiciliario será gratuíto ou cofinanciado.

DISPOSICIÓN FINAL

• A presente Ordenanza entrará en vigor o día da súa publicación no Boletín Oficial da Provincia."